Archive for December, 2011

ಮೂಡುವನು ರವಿ ಮೂಡುವನು ,ಮೋಡಗಳೊಡನೆ ಆಟವಾಡುವನು :೨೦೧೧ರ ಕೊನೆಯ ಚಿತ್ರಗಳು

Posted on December 31, 2011. Filed under: ಜರ್ಮನಿ, ವ್ಯೂರ್ತ್ಸ್ ಬುರ್ಗ್, ಹೊಸ ವರ್ಷ | Tags: , , , , , , , |

ಕನ್ನಡದ ಆದಿಕವಿ ಪಂಪ ತನ್ನ ‘ಆದಿಪುರಾಣ’ ಕಾವ್ಯದಲ್ಲಿ ಕವಿತ್ವವನ್ನು ಸಮುದ್ರಕ್ಕೆ ಹೋಲಿಸುತ್ತಾನೆ: ‘ ಇದು ನಿಚ್ಚಂ ಪೊಸತು ಅರ್ಣವoಬೊಲ್ ಅತಿ ಗಂಭೀರಂ ಕವಿತ್ವಂ ‘ . ಕಾವ್ಯವು ಸಮುದ್ರದಂತೆಯೇ ಎಲ್ಲ ಕಾಲಕ್ಕೂ ಹೊಸದಾಗಿಯೇ ಇರುತ್ತದೆ ಎನ್ನುವುದು ಕವಿಯಾಗಿ ಪಂಪನ ನಿಲುವು. ಆಕಾಶ ,ಸೂರ್ಯ ,ನೀರು -ಇವೆಲ್ಲ ವರ್ಷ ಬದಲಾದರೂ ನವನವೋನ್ಮೇಷವಾಗಿಯೇ ಇರುತ್ತವೆ.ನಮ್ಮ ನೋಡುವ ಕಣ್ಣುಗಳು ,ಗ್ರಹಿಸುವ ಮನಸ್ಸುಗಳು ನಿಮಿಷ ,ಗಂಟೆ ,ದಿನ,ತಿಂಗಳು,ವರ್ಷಗಳ ವಿಭಜನೆ ಮಾಡುತ್ತಾ ,ಹೊಸದನ್ನು ಕಾಣಲು ಬಯಸುತ್ತವೆ.

ಜರ್ಮನಿಯ ವ್ಯೂರ್ತ್ಸ್ ಬುರ್ಗ್ ನಗರದ ಒಳಗೆಯೇ ಹರಿಯುವ ಮಾಯಿನ್ ನದಿ ಇಲ್ಲಿನ ಜನರ ಜೀವನದಿ.ನಿನ್ನೆ ಶುಕ್ರವಾರ ,ದಶಂಬರ ಮೂವತ್ತು -೨೦೧೧ ಮುಗಿಯಲು ಇನ್ನೇನು ಒಂದು ದಿನ ಬಾಕಿ ಇದೆ ಎನ್ನುವಾಗ ಇಲ್ಲಿನ ಚಳಿಗಾಲದಲ್ಲಿ ಆಕಸ್ಮಿಕವಾಗಿ ಬಹಳ ದಿನಗಳ ಬಳಿಕ ರವಿ ಕಾಣಿಸಿಕೊಂಡ.ಈಬಾರಿಯ ದಶಂಬರದ ಇಲ್ಲಿನ ಚಳಿಗಾಲ ಬಹಳ ಆಕರ್ಷಕ ಆಗಿರಲಿಲ್ಲ.ಕಳೆದ ವರ್ಷ ದಶಂಬರದಲ್ಲಿ ಸಾಕಷ್ಟು ಹಿಮ ಬಿದ್ದು ‘ಬಿಳಿಯ ಕ್ರಿಸ್ಮಸ್ ‘ ಆಚರಿಸಿದ ಸಂಭ್ರಮ ಇತ್ತು.ಈಬಾರಿ ಒಂದು ದಿನ ಸ್ವಲ್ಪಬಿಳಿಯ ಧೂಳು  ಬಿದ್ದದ್ದರ ಹೊರತಾಗಿ,ಉಳಿದ ದಿನಗಳಲ್ಲಿ ಹಿಮದ ಪತ್ತೆ ಇಲ್ಲ, ರವಿಯ ಸುಳಿವು ಇಲ್ಲ.ಸದಾ ಕಾರ್ಮೋಡಗಳ ಒಡ್ಡೋಲಗ.ನಡುನಡುವೆ ಜಿಟಿಜಿಟಿ ಮಳೆ ಕೆಲವೊಮ್ಮೆ. ಬೆಳಕು  ಹರಿಯುವುದು ಎಂಟೂವರೆಗೆ,ಸಂಜೆ ನಾಲ್ಕು ಗಂಟೆಯ ವೇಳೆಗೆ ರಾತ್ರಿಯ ತೆರೆ ಬೀಳುತ್ತದೆ.ಹಾಗಾಗಿ ಕೊನೆಗೂ ಈವರ್ಷದ ಬೀಳ್ಕೊಡುಗೆಗಾದರೂ ರವಿ ಬಂದನಲ್ಲಾ ಎನ್ನುವ ಸಂತೃಪ್ತಿಯಿಂದ ಮಾಯಿನ್ ನದಿಯ  ದಂಡೆಯಲ್ಲಿ ,ಅದರ ಮೇಲಿನ ಹಳೆಯ ಸೇತುವೆಯ ಮೇಲಿಂದ ನಾನು ನಿನ್ನೆ  ತೆಗೆದ ಕೆಲವು  ಚಿತ್ರಗಳು ಇಲ್ಲಿವೆ.

ಚಿತ್ರಗಳನ್ನು ದೊಡ್ಡದಾಗಿ ನೋಡಲು ಅವುಗಳ ಮೇಲೆ ಕ್ಲಿಕ್ ಮಾಡಿರಿ.

ಇಲ್ಲಿನ ಚಿತ್ರಗಳು ಅವುಗಳದ್ದೇ ಅರ್ಥಗಳನ್ನು ಕೊಡಬಲ್ಲವು.ಕಾಲ ಓಡುವುದಿಲ್ಲ ,ಓಡುವವರು ನಾವೆಲ್ಲ.

ಮಾಯಿನ್ ನದಿಯ ಸೇತುವೆಯ ಮೇಲೆ ಟ್ರಾಮ್ ಓಡುತ್ತಿದೆ -ಕಾಲ ಕಾಯುವುದಿಲ್ಲ ಎಂದು ಅದಕ್ಕೆ ಗೊತ್ತು.

ರವಿ ಬೆಳಗುತ್ತಿದ್ದಾನೆ -ಈವರ್ಷ ಇನ್ನೆಲ್ಲಿ ಅವಕಾಶ ಎನ್ನುವ ಅವಸರ ಅವನಿಗೆ.

ಮೋಡಗಳು ಇಲ್ಲದ ಶುಭ್ರ ಆಕಾಶ ಒಂದು ಕಡೆ.ಶುದ್ಧ ನೀರು,ಹಸುರು ಕಾಡು .ಕಾಲನದಿಯನ್ನು ದಾಟಲು ಒಂದು ಸೇತುವೆ.

ಕಳೆದುಹೋದ ಯೌವನವನ್ನು ಮರಳಿ ಪಡೆದೇ ತೀರುತ್ತೇವೆ ಎಂದು ಕಾಯುತ್ತಿರುವ ಅಮರ ಮರಗಳು.ಆಕಾಶದಲ್ಲಿ  ಚಲಿಸುವ ಮೋಡಗಳತ್ತ ಅವುಗಳ ಆಸೆಯ ನೋಟ.

ಮೋಡ ಕನ್ನೆಯರ ಜೊತೆಗೆ ಸರಸ  ಆಟವಾಡುವ ರವಿ. ಜುಳುಜುಳು ಸರಸವಾಡುವ ಮಾಯಿನ್ ಕುಡಿನೋಟ ಬೀರಿದ್ದಾಳೆ ರವಿಯ ಕಡೆಗೆ.

ಕಟ್ಟೆ ಜಿಗಿದು ಚಿಮ್ಮುತ್ತಾಳೆ ಮಾಯಿನ್, ಜೀವನಕ್ಕೆ ಕಟ್ಟು ಹಾಕಬಹುದೇ ಏನು ?

ಹಳೆಯ ಸೇತುವೆ (ಆಲ್ತೆ ಮಾಯಿನ್ ಬ್ರೂಕೆ),ಹಳೆಯ ನದಿ ( ಮಾಯಿನ್ ) ,ಹಳೆಯ ಬಾನು -ಹೊಸತು ಯಾವುದಿದೆ ಅದೇ ಅದೇ ಏನು ?

ಹೊಸ ವರ್ಷದ ಪ್ರಯಾಣಕ್ಕೆ ಕ್ಷಣ ಗಣನೆ – ನೀರ ಮೇಲೆ ತೇಲಬೇಕು ಹಡಗು . ಹಡಗು ತುಂಬಿಸಲು ಹೋದವರು ಬಂದಿದ್ದಾರೆ,ಆದರೆ ಹೊಟ್ಟೆ ತುಂಬಿಸಲು ಹೋದವರು ಇನ್ನೂ ಬಂದಿಲ್ಲ.

ಬೇಗನೆ ಬರಲಿ ಹೊಸ ‘ವರ್ಷ’ ( ಮಳೆ ), ಚಿಗುರಲಿ ಮತ್ತೆ ನಮ್ಮ ತಳಿರುಗಳ ಹರ್ಷ.

ಹಳೆ ಬೇರು ,ಹೊಸ ಚಿಗುರು. ಚಳಿಗೆ ನಾವಿನ್ನೂ ಮರಗಟ್ಟಿಲ್ಲ. ನಾವು ಅಮರರು.

ಇದು ನಿಚ್ಚಂ ಪೊಸತು ಮಾಯಿನ್ ನದಿ  .ಇದಕೆ ಗಡಿಯಾರ ಕ್ಯಾಲೆಂಡರ್ ಗಳ ಹಂಗಿಲ್ಲ.

ಬಣ್ಣಬಣ್ಣದ ಬೆಲೂನು  ಮೇಲಕ್ಕೆ ಹಾರಬಿಡಿ , ಬದುಕ ಬೆಲೂನಿಗೆ ಸೂಜಿಮೊನೆ ಚುಚ್ಚಬೇಡಿ.

ನಿಂತಲ್ಲೇ ತಿರುಗುತ್ತಿದೆ ನೀರ ಚಕ್ರ  ; ನಿಂತಲ್ಲೇ   ತಿರುಗಿದರೆ  ನೀರು -ಅದು ಚಕ್ರವ್ಯೂಹ.

ಬೆಳ್ಳಗಿನ ನೊರೆ ನೊರೆ  ಉಕ್ಕಿ ಹರಿಯುತ್ತಿದೆ ಪಾತ್ರವನು , ಹೊಸವರ್ಷದ ಆಚರಣೆ ಆಗಲೇ  ಸುರುವಾಯಿತೇ ಏನು ?

ನೀ  ಹೊಂಟಿರುವುದು ಈಗ ಎಲ್ಲಿಗಾ  ,ನದಿಯ ದಂಡ್ಯಾಗ ಯಾರ ಕಾಣಕಾ ?

ಬಾನು ಭೂಮಿ ಅಪ್ಪಿದಲ್ಲಿ , ಏನು ರಮ್ಯ ನೀರಿನಲ್ಲಿ !

ನೀಲ -ಮೇಘ -ಶ್ಯಾಮ : ಪ್ರೀತಿಯೋ ಜಗಳವೋ !

ಮುಳುಗುವನು ರವಿ ಮುಳುಗುವನು  ಈಗ – ಮೂಡುವನು  ನೀಲಿ ಬಾನ ಬಟ್ಟೆ ತೊಟ್ಟು ಬೇಗ !

Read Full Post | Make a Comment ( 1 so far )

ಕುವೆಂಪು ಕಡಲ್ಗಿದಿರ್ ಪನಿಗೇಂ ಪ್ರದರ್ಶನಂ

Posted on December 29, 2011. Filed under: ಕನ್ನಡ ಸಾಹಿತ್ಯ, ಕುವೆಂಪು, Kannada Literature | Tags: , , , , , , |

ಕುವೆಂಪು (೨೯ ದಶಂಬರ ೧೯೦೪-೧೧ ನವಂಬರ ೧೯೯೪ ) ಅವರ ಮಹಾಕಾವ್ಯ ‘ಶ್ರೀರಾಮಾಯಣ ದರ್ಶನಂ ‘ನಲ್ಲಿ ಊರ್ಮಿಳೆ ಹೇಳುವ ಮಾತು ‘ಕಡಲ್ಗಿದಿರ್ ಪನಿಗೇಂ  ಪ್ರದರ್ಶನಂ ?’ ಗಂಡನಿಗಾಗಿ ತಾನು ತಪಸ್ವಿನಿಯಂತೆ ಬದುಕಿದ್ದು ಪ್ರದರ್ಶನಕ್ಕಲ್ಲ ಎನ್ನುವ ಊರ್ಮಿಳೆಯ ಪಾತ್ರಸೃಷ್ಟಿ -ಕುವೆಂಪು ಅವರ ಬದುಕಿನ ಪೂರ್ಣದೃಷ್ಟಿ . ‘ಆತ್ಮಶ್ರೀಗಾಗಿ ನಿರಂಕುಶಮತಿಗಳಾಗಿ ‘ ಎನ್ನುವ ಲೇಖನದಲ್ಲಿ  ಕುವೆಂಪು ಹೇಳುವ ಈ ಮಾತು ಈ  ಆಶಯಕ್ಕೆ ಪೂರಕವಾಗಿದೆ :” ಸದ್ಯ ,ಫಲಾಪೇಕ್ಷೆಗಿಂತಲೂ ಕೀರ್ತಿಮೋಹದಿಂದ  ಹೆಚ್ಚು ಅನಾಹುತವಾಗುತ್ತದೆ. ..ಮಂದಿಯ ಕೈಚಪ್ಪಾಳೆ, ವೃತ್ತಪತ್ರಿಕೆಗಳ ಅಗ್ಗದ ಸ್ತುತಿ, ಬಿರುದು ಬಾವಲಿಗಳ ವ್ಯಾಮೋಹ ಇವುಗಳಿಗೆ ವಶನಾಗದೆ , ತಾನು ಹಿಡಿದ ಕೆಲಸವನ್ನು ಪಟ್ಟು ಹಿಡಿದು ನಿಶ್ಶಬ್ದವಾಗಿ ಮಾಡುವಾತನೇ  ನಿಜವಾದ ಕರ್ಮಯೋಗಿ.”

” ಆತ್ಮಶ್ರೀಗಾಗಿ  ನಿರಂಕುಶಮತಿಗಳಾಗಿ ‘ – ಇದು ಕುವೆಂಪು ಅವರು ಶ್ರೀರಂಗಪಟ್ಟಣದಲ್ಲಿ ಯುವಜನ ಸಮ್ಮೇಳನದಲ್ಲಿ ೧೯೩೫ ರಲ್ಲಿ ಮಾಡಿದ ಭಾಷಣ. ” ಮತೀಯ ಮತ್ತು ಸಾಮಾಜಿಕ ಅಂಧಶ್ರದ್ಧೆ ಮತ್ತು ಅಂಧಾಚಾರಗಳಿಂದ ನಾವು ಪಾರಾಗದಿದ್ದರೆ ನಮಗೆ ಉದ್ಧಾರವಿಲ್ಲ.” ನಮ್ಮ ದೇಶ ಸ್ವಾತಂತ್ರ್ಯವನ್ನು ಪಡೆಯುವ ಮೊದಲು ಎಲ್ಲಕಡೆ ವ್ಯಾಪಿಸಿದ್ದ  ವರ್ಣಾಶ್ರಮ ,ಜಾತಿ ಪದ್ಧತಿ ,ಅಸ್ಪೃಶ್ಯತೆ ಮೊದಲಾದ ಸಾಮಾಜಿಕ ಅನ್ಯಾಯಗಳು ಸ್ವಾತಂತ್ರ್ಯದ ಬಳಿಕ ನಿರ್ನಾಮವಾಗುತ್ತವೆ ಎಂದು ಯುವಜನರು ಭಾವಿಸಿದ್ದರು.ಆದರೆ ಅಂತಹ ಯಾವ ಪವಾಡವೂ ನಡೆಯಲಿಲ್ಲ. ಇದಕ್ಕೆ ಕುವೆಂಪು ಕೊಡುವ ಕಾರಣ -ಮತಾಂಧತೆ ,ಮತಭ್ರಾಂತಿ, ಮತದ್ವೇಷ ಮತ್ತು ಮತ ಸ್ವಾರ್ಥತೆ ಇವು ‘ವಿಚಾರವಾದ’ ಮತ್ತು ‘ವೈಜ್ಞಾನಿಕ ದೃಷ್ಟಿ’ ಗಳಿಗೆ ಕೊಟ್ಟ ಕೊಡಲಿಪೆಟ್ಟು. ನಮ್ಮಲ್ಲಿ ಸಂಸ್ಕೃತಿಯ ಹೆಸರಿನಲ್ಲಿ  , ಮತದ ಹೆಸರಿನಲ್ಲಿ , ಧರ್ಮದ ಸೋಗಿನಲ್ಲಿ , ಪೂರ್ವಿಕರ ಪ್ರಾಚೀನ ವೈಭವಗಳ ಕರ್ಮಕಾಂಡವನ್ನು ಮತ್ತೆ ಜೀರ್ಣೋದ್ಧಾರ ಮಾಡಿ ಪ್ರತಿಷ್ಠಾಪಿಸುವ ಸ್ವಾರ್ಥತಾ ಮೂಲವಾದ ಕುಂಟುನೆಪದಲ್ಲಿ ,ಅವಿವೇಕದ ಮೌಡ್ಯಗಳಿಗೆ ವೈಜ್ಞಾನಿಕತೆಯ ಮತ್ತು ವಿಚಾರದ ನಕಲಿ ಮುಲಾಮು ಹಚ್ಚಿ , ಜನರನ್ನು ದಿಕ್ಕು ತಪ್ಪಿಸಿ ವಂಚಿಸುವುದನ್ನು ಕುವೆಂಪು ಬೆಟ್ಟುಮಾಡಿ ತೋರಿಸುತ್ತಾರೆ.

ಕುವೆಂಪು ಅವರ ಈ ಭಾಷಣದ ಬಗ್ಗೆ ಆ ಕಾಲದಲ್ಲಿ ಜಾತಿವಾದಿಗಳು ಪತ್ರಿಕೆಗಳಲ್ಲಿ ಉಗ್ರಟೀಕೆಗಳನ್ನು ಮಾಡಿ,ಕನ್ನಡ ಉಪನ್ಯಾಸಕರಾಗಿದ್ದ ಕುವೆಂಪು ಅವರ ಮೇಲೆ ಶಿಸ್ತಿನ ಕ್ರಮ ಕೈಗೊಳ್ಳಲು ಸರಕಾರ ಮತ್ತು ಮೈಸೂರು ವಿಶ್ವವಿದ್ಯಾನಿಲಯವನ್ನು ಒತ್ತಾಯಿಸಿದರು. ಸರಕಾರವು ಮೈಸೂರು ವಿಶ್ವವಿದ್ಯಾನಿಲಯಕ್ಕೆ ಈ ಕುರಿತು ತನಿಖೆ ಮಾಡಿ ವರದಿ ಒಪ್ಪಿಸುವಂತೆ ಕೇಳಿತಂತೆ.ವಿಚಾರಣೆಯ ಕರ್ತವ್ಯ ಆಗ ಅಲ್ಲಿ  ಕನ್ನಡ  ಪ್ರಾಧ್ಯಾಪಕರಾಗಿದ್ದ ಟಿ.ಎಸ.ವೆಂಕಣ್ಣಯ್ಯ ಅವರ ಮೇಲೆ ಬಿತ್ತು. ಈ ಪ್ರಸಂಗದ ಕುರಿತು ಕುವೆಂಪು ಈರೀತಿ ಬರೆದಿದ್ದಾರೆ: ” ಒಂದು ದಿನ ವೆಂಕಣ್ಣಯ್ಯನವರು  ನನ್ನನ್ನು ಕೇಳಿದರು ತಮಗೆ ಬಂದಿದ್ದ ಆಜ್ಞೆಯ ವಿಚಾರ ಏನನ್ನೂ ತಿಳಿಸದೆ, ಲೋಕಾಭಿರಾಮವಾಗಿ ಎಂಬಂತೆ , ‘ಅದೇನಯ್ಯ ನೀನು  ಭಾಷಣ ಮಾಡಿದಿಯಂತೆ ಶ್ರೀರಂಗಪಟ್ಟಣದಲ್ಲಿ ? ತಂದುಕೊಡುತ್ತೀಯೇ  ನನಗೆ ? ‘ ಅಚ್ಚಾಗಿದ್ದ ಕೆಲವು ಪ್ರತಿಗಳು ನನ್ನಲ್ಲಿ ಇದ್ದುವು. ಅವರಿಗೆ ಒಂದನ್ನು ಕೊಟ್ಟೆ.ಅವರು ನನಗೆ ಮುಂದೆ ಯಾವ ವಿಚಾರವನ್ನೂ ಹೇಳಲಿಲ್ಲ. ಆಮೇಲೆ ತಿಳಿದುದನ್ನು ಬರೆಯುತ್ತಿದ್ದೇನೆ.ನನ್ನ ಭಾಷಣವನ್ನು ಓದಿದ ಅವರು ವಿಶ್ವವಿದ್ಯಾನಿಲಯಕ್ಕೆ ಬರೆದ ಕಾಗದದಲ್ಲಿ  ‘ ನಾನು ನನ್ನ ಮಗನಿಗೆ ಬುದ್ಧಿ ಹೇಳಬೇಕಾಗಿ ಬಂದರೆ ಇದಕ್ಕಿಂತಲೂ ವಿಚಾರಪೂರ್ವಕವಾಗಿ ಸೊಗಸಾಗಿ ಸಮರ್ಥವಾಗಿ ಹೇಳಲಾರೆ ‘ ಎಂದು ಬರೆದಿದ್ದರಂತೆ.”

‘ಮಲೆನಾಡಿನ ಯುವಕರಲ್ಲಿ’ ಎಂಬ ಭಾಷಣ ಲೇಖನದಲ್ಲಿ ಕುವೆಂಪು ದೇವರುಗಳ ಆರಾಧನೆಯಲ್ಲಿರುವ ಮೌಡ್ಯ,ಮದ್ಯಪಾನದ ಕೆಡುಕು ,ಕೋರ್ಟು ವ್ಯವಹಾರಗಳಿಂದ ಮನೆ ಹಾಳಾಗುವುದು -ಇವನ್ನು ವಿವರಿಸಿ ತಿಳಿಸುತ್ತಾರೆ. “ಪರೀಕ್ಷೆ ,ವಿಮರ್ಶೆ ,ವಿಚಾರ -ಇವೆಲ್ಲವೂ ನಮ್ಮ ಹುಟ್ಟು ಹಕ್ಕುಗಳು “.ಇದು ಕುವೆಂಪು ಮಂತ್ರ.ದುಂದುವೆಚ್ಚದ ಬಗ್ಗೆ ಕುವೆಂಪು ಕಿವಿಮಾತು : ” ನಿಮ್ಮ ಕನ್ಯೆಯರಿಗೆ ಸೇರು ಬಂಗಾರದ ಕೊರಳಹಾರಕ್ಕಿಂತಲೂ ಮುದ್ದಾದ ಕನ್ನಡ ಅಕ್ಷರಮಾಲೆಯು ರಮಣೀಯತರವಾದ ಅಲಂಕಾರ.’” ವಿದ್ಯಾರ್ಥಿಗಳಿಗೆ ಮತಿ ಗೌರವ ಬೇಕು ಎನ್ನುವ ಕುವೆಂಪು ಅದು ಸಾಧಿತವಾಗುವ ಬಗೆಯನ್ನು ಹೀಗೆ ತಿಳಿಸುತ್ತಾರೆ :  ” ಗ್ರಾಮಸೇವೆ,ಭಾಷಾ ಸೇವೆ,ಜ್ಞಾನಪ್ರಸಾರ,ಸಾಹಿತ್ಯ ಪ್ರಚಾರ,ವೈದ್ಯ ಸಹಾಯ,ರೋಗ ಶುಶ್ರೂಷೆ  ಇತ್ಯಾದಿ ಅಲಘು ಕಾರ್ಯಗಳಲ್ಲಿ ಪಾಲುಗೊಳ್ಳುವ  ವಿದ್ಯಾರ್ಥಿಯ ಮತಿ ಸಜೀವವೂ ಸುಸ್ಪಷ್ಟವೂ ಆಗುತ್ತದೆ. ”  “ವಿದ್ಯೆಯ ಲೋಕದಲ್ಲಿ ಧನಿಕರಾಗಲು ಸುಲಭೋಪಾಯಗಳಿಲ್ಲ.ಅಲ್ಲಿ ಯಾರೂ ವಂಚನೆಯಿಂದ ಸಂಪತ್ತು ಗಳಿಸಲಾರರು . ಅಲ್ಲಿ ದುಡಿಮೆಯಂತೆ ಪಡಿ.”

‘ ವಿದ್ಯಾರ್ಥಿಗಳಿಗೇಕೆ  ಆತ್ಮಶ್ರೀ ‘ ಎಂಬ ಕುವೆಂಪು ಉಪನ್ಯಾಸ ಲೇಖನವು ಆಧ್ಯಾತ್ಮಿಕ ಪರಿಕಲ್ಪನೆಯನ್ನು ಮನೋವೈಜ್ನಾನಿಕವಾಗಿ ವಿವರಿಸುತ್ತದೆ.ಧ್ಯಾನ ,ಚಿಂತನೆಗಳಿಂದ ನಮ್ಮ ಮನಸ್ಸು ಹರಿತವಾಗುತ್ತದೆ ,ಗಟ್ಟಿಯಾಗುತ್ತದೆ ಎನ್ನುವುದನ್ನು ಇಲ್ಲಿ ತಿಳಿಸಲಾಗಿದೆ. ” ತುಂಬು ಬಾಳಿಗೆ ಬಹಿರ್ಮುಖತೆಯಷ್ಟೇ ಆವಶ್ಯಕ  ಅಂತರ್ಮುಖತೆ. ಬದುಕನ್ನು ಕುರಿತು ಜಾನಿಸುವುದೂ ಚೆನ್ನಾಗಿ ಬದುಕುವುದಕ್ಕೆ ನೆರವಾಗುತ್ತದೆ ” ಎನ್ನುವುದು ಕುವೆಂಪು ಸೂತ್ರ. ಅದಕ್ಕಾಗಿಯೇ ಅವರು ಹೇಳುತ್ತಾರೆ :  ” ಪುಸ್ತಕಗಳಿಂದಲೂ ವ್ಯಕ್ತಿಗಳಿಂದಲೂ ಜೀವನವ್ಯಾಪಾರಗಳಿಂದಲೂ ನಾವು ಪಡೆಯುವ ತಿಳಿವು ನಮ್ಮ ಅನುಭವಕ್ಕೆ ಹಿಡಿಯಬೇಕಾದರೆ ,ಅದರಿಂದ ನಮ್ಮ ಆತ್ಮಶ್ರೀ ಆವಿರ್ಭವಿಸಬೇಕಾದರೆ , ಏಕಾಂತವೂ ಮೌನವೂ ಧ್ಯಾನವೂ ಅತ್ಯಗತ್ಯ. ದಿನದ ದೀರ್ಘ ಜೀವನದಲ್ಲಿ ಸ್ವಲ್ಪ ಕಾಲವನ್ನಾದರೂ ಅದಕ್ಕೆ ಮೀಸಲಾಗಿಸುವುದರಿಂದಲೇ ಬಾಳು ಪರಿಪೂರ್ಣವೂ ಸುಂದರವೂ ಆಗಲು ಸಾಧ್ಯ. ” ತಪಸ್ಸಿನ ಬಗ್ಗೆ ಇನ್ನೊಂದು ಕಡೆ ಕುವೆಂಪು ಕೊಡುವ ವಿವರಣೆ ಧರ್ಮನಿರಪೇಕ್ಷವಾದದ್ದು :  “ನಾವು ಯಾವ ಕೆಲಸ ಉದ್ಯೋಗಗಳನ್ನು ಕೈಕೊಂಡಿದ್ದರೂ  ಅವುಗಳನ್ನು ಶ್ರದ್ಧೆಯಿಂದ ,ಭಕ್ತಿಯಿಂದ ,ನಿಷ್ಠೆಯಿಂದ ,ಗುರಿ ಸಾರುವ ತನಕ ಸಾಧಿಸುವುದೇ ತಪಸ್ಸು. “

ಇಂದು ಕುವೆಂಪು ಹುಟ್ಟಿದ ದಿನ.ತೊಂಬತ್ತು ವರ್ಷಗಳ ಕಾಲ ಕರ್ನಾಟಕದಲ್ಲೇ  ಇದ್ದು ,ಸಾರ್ಥಕ ಬಾಳನ್ನು ಬದುಕಿ,ಇಡೀ ಇಪ್ಪತ್ತನೆಯ ಶತಮಾನವನ್ನು ತಮ್ಮ ಮೇರು ಬದುಕು ಬರಹಗಳಿಂದ ರೂಪಿಸಿದ ಕುವೆಂಪು ಎಂಬ ‘ ಕಡಲು ‘ ಈಗ ಇಲ್ಲ. ಈ ಕಡಲಿನ ಹೆಸರಿನಲ್ಲಿ ಈಗ ನಡೆಯುತ್ತಿರುವ ‘ ಪನಿ ‘ಗಳ ಪ್ರದರ್ಶನ ಅದು ನಿಜವಾದ ಕುವೆಂಪು ಚಿಂತನೆಯ ಪನಿಗಳಾದರೂ ಆಗಿವೆಯೇ ಎನ್ನುವ ಪ್ರಶ್ನೆಗೆ ಸಕಾರಾತ್ಮಕ ಉತ್ತರ ದೊರೆಯುವುದು ಕಷ್ಟ. ಪ್ರದರ್ಶನ,ಅಗ್ಗದ ಪ್ರಚಾರ ,ಬಿರುದುಬಾವಲಿಗಳು -ಇವುಗಳ ಅಬ್ಬರದಲ್ಲಿ ಕುವೆಂಪು ಹೆಸರು ಒಂದು ಬ್ಯಾನರ್ ಮಾತ್ರ ಆಗುತ್ತಿದೆಯೇ ? ಸತ್ಯಾಗ್ರಹವೂ ಒಂದು ಈವೆಂಟ್ ಮ್ಯಾನೆಜ್ ಮೆಂಟ್ ನ ಭಾಗವಾಗುತ್ತಿರುವ ದಿನಗಳಲ್ಲಿ ,’ಆತ್ಮಶ್ರೀ ‘ ಎಷ್ಟು ಪ್ರಮಾಣದಲ್ಲಿ ಉಳಿದಿದೆ ? ಕುವೆಂಪು ಅವರ ಶ್ರೀರಂಗಪಟ್ಟಣದ  ವೈಚಾರಿಕ  ಭಾಷಣದ ರೀತಿಯ ಭಾಷಣವನ್ನು ಕರ್ನಾಟಕದ  ಯಾವುದೇ ವಿಶ್ವವಿದ್ಯಾನಿಲಯದ ಅಧ್ಯಾಪಕರು ಇವತ್ತು ಮಾಡಿದರೆ ಅವರ ವಿಚಾರಣೆ ನಡೆಸಿ ಅವರ ಮೇಲೆ ಶಿಸ್ತುಕ್ರಮ ಕೈಗೊಳ್ಳುವ ಬೆದರಿಕೆ ಇಲ್ಲವೇ ?ಮತ ಮತ್ತು ಅಧ್ಯಾತ್ಮ ಇವು ಕಲಸುಮೇಲೋಗರ ಆಗಿರುವ ಇಂದಿನ ಸನ್ನಿವೇಶದಲ್ಲಿ ಕುವೆಂಪು ಅವರ ಅಧ್ಯಾತ್ಮ ತತ್ವ ಮತ್ತು ಸೂತ್ರಗಳನ್ನು ಅಸೂಕ್ಸ್ಮ ಮನಸ್ಸುಗಳು ಹೇಗೆ ಗ್ರಹಿಸಬಲ್ಲವು ? ಜಯಚಾಮರಾಜ ಒಡೆಯರಿಗೆ ಖಾಸಗಿ ಟ್ಯೂಶನ್ ಕೊಡಲು ನಿರಾಕರಿಸಿದರು ಕುವೆಂಪು. ನಾವು ಇಂದು ಒಡೆಯರಿಗೆ ಹಾಕುವ ಸಲಾಂ ಯಾವ ಬಗೆಯದು ? ಕುವೆಂಪು ನಿಧನರಾದಾಗ ೧೯೯೪ರಲ್ಲಿ ಕರ್ನಾಟಕದಲ್ಲಿ ಚುನಾವಣೆಯ ಕಾವು ಏರಿತ್ತು.ಒಂದು ಕಡೆ ಕುವೆಂಪು ಅಗಲಿಕೆಯ ಶೋಕಪ್ರದರ್ಶನದಲ್ಲಿ  ‘ವಿಶ್ವಮಾನವ ಸಂದೇಶ ‘ದ ಭಜನೆ ಮಾಡುತ್ತಲೇ , ರಾಜಕೀಯ ಪಕ್ಷಗಳು ತಮ್ಮ ಮತಗಳನ್ನು ‘ಮತ’ ಗಳ ಮೂಲಕ ಜಾತಿಗಳ ಮೂಲಕ ಒಡೆದು ಬಾಚುವ ಕೆಲಸ ಮಾಡಿದವು. ಈ ಪ್ರವೃತ್ತಿಯು  ಈಗ ಕರ್ನಾಟಕದಲ್ಲಿ ‘ಸಾರ್ವಜನಿಕ ನಾಚಿಕೆ’ಯನ್ನು ಮೀರಿ ,ಗೌರವದ ಪಟ್ಟವನ್ನು ಏರಿದೆ.

ಮಲೆನಾಡು ಮಾತ್ರ ಅಲ್ಲ ,ಇಡೀ ಕರುನಾಡಿನಲ್ಲೇ ಕನ್ನಡ ಅಕ್ಷರಮಾಲೆಯನ್ನು ಕೊರಳಿಂದ ಕಿತ್ತೆಸೆದು ,ಇಂಗ್ಲಿಶ್ ಆಲ್ಪಾಬೆಟ್ ನ ನೆಕ್ಲೀಸ್ ನ್ನು ಮಕ್ಕಳಿಗೆ ತೊಡಿಸಲಾಗುತ್ತಿದೆ.ಕುವೆಂಪು ಹೇಳುವ ಮೌನ,ಧ್ಯಾನ ,ಚಿಂತನೆ ಮಾಡುವ ವ್ಯವಧಾನ ,ಮನಸ್ಸು ,ಅವಕಾಶ ಇಲ್ಲದೆ ಕನ್ನಡಿಗರ ಬದುಕು ಉದ್ವೇಗ ,ಆಕ್ರೋಶ , ,ದ್ವೇಷ ,ಜಗಳ,ಪ್ರದರ್ಶನಗಳ ಅಬ್ಬರಸಂತೆಯಲ್ಲಿ  ನಲುಗುತ್ತಿದೆಯೇ ?

ಕುವೆಂಪು ಅವರ ‘ಮಲೆಗಳಲ್ಲಿ ಮದುಮಗಳು’ ಕಾದಂಬರಿಯಲ್ಲಿ ‘ಹುಲಿಕಲ್ಲು ನೆತ್ತಿ ‘ ಒಂದು ಮಹತ್ವದ ಪ್ರತಿಮೆ.ಅನೇಕ ಮಂದಿ ತಮ್ಮ ಸಾಧ್ಯತೆಗಳ ಆತ್ಮವಿಶ್ವಾಸ ಹೊಂದುವುದು ಹುಲಿಕಲ್ಲುನೆತ್ತಿಯನ್ನು  ಏರುವ ಮೂಲಕ ,ದಾಟುವ ಮೂಲಕ.ಈ ಕಾದಂಬರಿಯ ಸುಬ್ಬಣ್ಣ  ಹೆಗ್ಗಡೆಯ ಪಾತ್ರ  ಒಂದು ಬಗೆಯ  ಆದರ್ಶ ಮತ್ತು ವಾಸ್ತವ.ಕೋಳಿ ಕುರಿ ಹಂದಿಗಳ ಪ್ರಾಕೃತಿಕ ಪರಿಸರದಲ್ಲಿ ಬೆಳೆದ ಸುಬ್ಬಣ್ಣ ಹೆಗ್ಗಡೆ ಎಲ್ಲ ಆಸೆಗಳನ್ನು ಹೊತ್ತುಕೊಂಡು ಹುಲಿಕಲ್ಲು ನೆತ್ತಿಯನ್ನು ಏರುವುದು ಒಂದು ಸಾಹಸ.ಗುತ್ತಿಯೂ ಹುಲಿಕಲ್ಲು ನೆತ್ತಿಯನ್ನು ಏರಿ ಹೋಗುತ್ತಾನೆ.

ಹುಲಿಕಲ್ಲು ನೆತ್ತಿಯಲ್ಲಿ ಒಂದು ಕಲ್ಲು , ಕುವೆಂಪು ಕಡಲಿನಲ್ಲಿ ಒಂದು ಹನಿ -ಇಷ್ಟಾದರೂ ಆಗುವ ನಮ್ಮ ನಿರ್ಧಾರ : ಕುವೆಂಪು ಹುಟ್ಟುದಿನದ ಆಚರಣೆ -ನಮ್ಮ ಮತಿ ಮತಿಯಲ್ಲಿ .

Read Full Post | Make a Comment ( None so far )

ಜರ್ಮನ್ ಕುಟುಂಬದೊಡನೆ ಒಂದು ಕ್ರಿಸ್ಮಸ್ ಸಂಜೆ :ಮೂವರು ಹೆಣ್ಣುಮಕ್ಕಳ ಗೋದಲಿಯಲ್ಲಿ

Posted on December 27, 2011. Filed under: ಕ್ರಿಸ್ಮಸ್, ಜರ್ಮನಿ | Tags: , , , , , , |

ಮೇಜಿನ ಉದ್ದಕ್ಕೆ ಮೂರು ಮಡಕೆಗಳು.ಅವುಗಳ ಕೆಳಗೆ ಉರಿಯುವ ಸ್ಪಿರಿಟ್ ದೀಪಗಳು.ಮಡಕೆಯ ಒಳಗೆ ಕರಗಿ ನೀರಾಗಿ ಬೆಚ್ಚನೆ ಕುದಿಯುತ್ತಿರುವ ಚೀಸ್.ಉದ್ದನೆಯ ಮುಳ್ಳಿನ ಮೊನೆ ಉಳ್ಳ ಲೋಹದ ಕಡ್ಡಿಗಳ ಮೊನಚು ಮುಳ್ಳಿಗೆ ಬ್ರೆಡ್,ಕ್ಯಾರೆಟ್,ತರಕಾರಿ ತುಂಡುಗಳು,ಮಾಂಸದ ಚೂರುಗಳು-ಇವನ್ನು ಸಿಕ್ಕಿಸಿ ,ಕುದಿಯುವ ಚೀಸ್ ಮಡಕೆಯ ಒಳಗೆ  ಕಡ್ಡಿಗಳನ್ನು  ಮುಳುಗಿಸಿ ಬಿಡುವುದು.ನಾಲ್ಕೈದು ನಿಮಿಷ ಕಳೆದ ಬಳಿಕ  ,ಕಡ್ಡಿಗಳನ್ನು ಹೊರಕ್ಕೆ ತೆಗೆದು ,ಅದರ ಮೊನೆಯಲ್ಲಿ ಸಿಕ್ಕಿಸಿದ್ದ ವ್ಯಂಜನಗಳನ್ನು -ಬ್ರೆಡ್,ತರಕಾರಿ ತುಂಡು,ಮಾಂಸದ ಚೂರು- ಬೆಂದು ಹೊರಬಂದವನ್ನು ,ಮೇಜಿನ ಮೇಲೆ ಹರಡಿದ್ದ ಬಗೆ ಬಗೆಯ ಸಾಸ್ ಗಳಲ್ಲಿ ಅದ್ದಿ ತಿನ್ನುವುದು.ನಾವು ಹನ್ನೊಂದು ಮಂದಿ ಮೂರು ಮಡಕೆಗಳ ಸುತ್ತ  ಚುಚ್ಚುವ ,ಅದ್ದುವ ,ಬೇಯಿಸುವ ,ಹೊರತೆಗೆಯುವ,ಲೇಪಿಸುವ ,ರುಚಿ ನೋಡುವ ಮತ್ತು ಈ ಎಲ್ಲ ಷಟ್ ಸ್ಥಲಗಳ ನಡುವೆ ಹರಟುವ ನೆನಪುಗಳನ್ನು ಹಂಚಿಕೊಳ್ಳುವ ನಗೆಯಾಡುವ ಮೂರು ಲೋಕಗಳಲ್ಲಿ ಒಟ್ಟಿಗೇ ಸಂಚರಿಸುತ್ತಿದ್ದೆವು.

ಈ ‘ ಫೋನ್ ದ್ಯು ‘ (Fondue ) ಊಟದ ಆಟ ನಡೆದದ್ದು ಮೊನ್ನೆ ಕ್ರಿಸ್ಮಸ್ ರಾತ್ರಿಯಲ್ಲಿ ,ದಶಂಬರ ೨೪ ರಂದು ಜರ್ಮನಿಯ ವೈನ್ ಗಾರ್ತೆನ್ -ಬಾದೆನ್   (Weingarten-Baden )ಬಳಿಯ ಹಳ್ಳಿಯ ಆಲ್ಬೇರ್ತ್ ರೈಷೆರ್ತ್ (Albert Reichert ) ಅವರ ಮನೆಯಲ್ಲಿ.ಊಟದ ಮೇಜಿನ ಎರಡು ಪಕ್ಕಗಳಲ್ಲಿ ಕುಳಿತವರು -ಮನೆಯ ಒಡೆಯ ಸುಮಾರು ೬೮ ವರ್ಷ ವಯಸ್ಸಿನ ಆಲ್ಬೇರ್ತ್ ( ಇಂಗ್ಲಿಶ್ ನಲ್ಲಿ ಆಲ್ಬರ್ಟ್ ,ಜರ್ಮನ್ ಭಾಷೆಯಲ್ಲಿ ಆಲ್ಬೇರ್ತ್ ),ಆಲ್ಬೇರ್ತ್ ಹೆಂಡತಿ ಎರ್ಮ ,ಆಲ್ಬೇರ್ತ್ ರ ಮೂವರು ಹೆಣ್ಣುಮಕ್ಕಳು -ಹೈಕೆ, ಕಾರಿನ್, ಊತ್ತೆ. ಹೈಕೆಯ ಗಂಡ ಥಾಮಸ್ ,ಕಾರಿನ್ ಗಂಡ ಆಂದ್ರೆ ,ಊತ್ತೆಯ ಗಂಡ ಥಾಮಸ್ ( ಇಬ್ಬರು ಥಾಮಸ್ ಇದ್ದ ಕಾರಣ ಆಲ್ಬೇರ್ತ್ ಅವರಿಗೆ ಬೇರೆ ಬೇರೆ ಸಂಖ್ಯೆ ಕೊಟ್ಟಿದ್ದರು) ,ಪ್ರೊ.ಹೈದ್ರೂನ್ ಬ್ರೂಕ್ನರ್, ಬ್ರೂಕ್ನರ್  ಅವರ  ತಾಯಿ ಜೆನ್ತಾ ಮತ್ತು ನಾನು. ಆಲ್ಬೇರ್ತ್ ಅವರ ಮಗಳು ಊತ್ತೆಯ ಗಂಡ ಥಾಮಸ್ -ಬ್ರೂಕ್ನರ್ ಅವರ ತಮ್ಮ. ಹೀಗಾಗಿ ಬ್ರೂಕ್ನರ್ ಅವರ ತಮ್ಮನ ಮಾವನ ಮನೆಯಲ್ಲಿ ಈ ವರ್ಷ ಇಡೀ ಕುಟುಂಬದವರು ಕ್ರಿಸ್ಮಸ್ ಆಚರಿಸಿದ್ದರು. ನಾನು ಒಬ್ಬ ಮಾತ್ರ ಆ ದಿನದ ಕೂಟದಲ್ಲಿ ಅತಿಥಿ.ಆದರೆ ಇಡೀ ಆಲ್ಬೇರ್ತ್ ಕುಟುಂಬ ನನ್ನನ್ನು ಅವರ ಮನೆಯ ಅವರ ಕುಟುಂಬದ ಆತ್ಮೀಯ ಬಂಧುವಿನಂತೆ  ನೋಡಿಕೊಂಡರು.

ಜರ್ಮನಿಯ ನೈಋತ್ಯ ದಿಕ್ಕಿನಲ್ಲಿ ಇರುವ ‘ಬಾದೆನ್ ವ್ಯೂರ್ತೆಮ್ ಬೆರ್ಗ್’ ಪ್ರಾಂತ್ಯದ ಒಂದು ಸಣ್ಣ  ಪೇಟೆ ‘ ವೈನ್ ಗಾರ್ತೆನ್ ‘. ಜರ್ಮನ್ ಭಾಷೆಯ ‘ವೈನ್ ಗಾರ್ತೆನ್ ‘ ಅಂದರೆ ‘ವೈನ್ ತೋಟ ‘. ಈ ಊರಿನ  ಸುತ್ತುಮುತ್ತಲೂ ದ್ರಾಕ್ಷಿ ತೋಟಗಳು ವಿಸ್ತಾರವಾಗಿ ಹರಡಿಕೊಂಡಿರುವುದರಿಂದ ಈ ಹೆಸರು ಬಂದಿದೆ. ಮುನಿಸಿಪಾಲಿಟಿ ಆಗಿರುವ ವೈನ್ ಗಾರ್ತೆನ್ ನ ಜನಸಂಖ್ಯೆ ಹತ್ತುಸಾವಿರದ ಒಳಗೆ.ಇಲ್ಲಿನ ಜನರಲ್ಲಿ ಸುಮಾರು ಮೂರನೇ ಎರಡರಷ್ಟು ಪ್ರೊಟೆಸ್ಟೆಂಟರು ಮತ್ತು ಮೂರನೇ ಒಂದರಷ್ಟು ಕ್ಯಾಥೋಲಿಕರು .ಹಾಗಾಗಿ ಎರಡೂ ಚರ್ಚುಗಳು ಅಕ್ಕಪಕ್ಕ ಇವೆ.ಕಾರ್ಲ್ ಸ್ರೂಹೆ ಜಿಲ್ಲಾ ಕೇಂದ್ರ. ವೈನ್ ಗಾರ್ತೆನ್ ನಲ್ಲಿ ಒಂದು ಪ್ರಾಥಮಿಕ ಮತ್ತು ಒಂದು  ಮಾಧ್ಯಮಿಕ ಶಾಲೆ ಇದೆ.ವೈನ್ ಮತ್ತು ಹಣ್ಣುಗಳ ರಸಗಳ ಉತ್ಪಾದನೆ,ಮರದ ಮತ್ತು ಲೋಹದ ಕೆಲವು ಸಣ್ಣ ಕಾರ್ಖಾನೆಗಳು, ಭೋಜನ ಕಲೆಯ ಕೇಂದ್ರ ,ಆಟದ ಬಯಲುಗಳ ಜೊತೆಗೆ ಪಕ್ಕದಲ್ಲೇ ‘ಕಾದಿಟ್ಟ ಅರಣ್ಯ’ ಕೂಡಾ ಇದೆ.ಒಂದು ಹಳೆಯ ಸಣ್ಣ ಕಾಸಲ್ (ಕೋಟೆ ) ಪೇಟೆಯ ಒಂದು ತುದಿಯಲ್ಲಿ ಎತ್ತರದಲ್ಲಿ ಕಾಣಿಸುತ್ತದೆ.

ದಶಂಬರ ೨೫ ರಂದು ಬೆಳಗ್ಗೆ ವೈನ್ ಗಾರ್ತೆನ್ ನ ನಿರ್ಜನ ಬೀದಿಗಳಲ್ಲಿ ಅಡ್ಡಾಡಿ ತಣ್ಣನೆಯ ಕ್ರಿಸ್ಮಸ್ ಮುಂಜಾನೆ ನಾನು ತೆಗೆದ ಕೆಲವು ಫೋಟೋಗಳನ್ನು ಇಲ್ಲಿ ಕೊಟ್ಟಿದ್ದೇನೆ.

ವೈನ್ ಗಾರ್ತೆನ್ ನಿಂದ ಸುಮಾರು ನಾಲ್ಕು  ಕಿಲೋ ಮೀಟರ್  ದೂರದ ಹಳ್ಳಿಯಲ್ಲಿ ಆಲ್ಬೇರ್ತ್ ಅವರ ಮನೆ.ಇಂಜಿನಿಯರ್ ಆಗಿ ಕೆಲಸಮಾಡಿ ಈಗ ನಿವೃತ್ತ ಆಗಿರುವ ಆಲ್ಬೇರ್ತ್ ಈಗಲೂ ಆ ಕಂಪೆನಿಯಲ್ಲಿ  ಸಮಾಲೋಚಕ ಆಗಿ ಇದ್ದಾರೆ.ಅಗತ್ಯ ಬಿದ್ದಾಗ ಇವರ ಅನುಭವವನ್ನು ಕಂಪೆನಿ ಬಳಸಿಕೊಳ್ಳುತ್ತದೆ.ಆಲ್ಬೇರ್ತ್ ಅವರಿಗೆ ಮೂವರು ಹೆಣ್ಣುಮಕ್ಕಳು- ಹೈಕೆ,ಕಾರಿನ್  ಮತ್ತು ಊತ್ತೆ. ಆಲ್ಬ್ರೆತ್ ಅವರ ಹೆಂಡತಿ  ಮೂರು ಮಕ್ಕಳು ಸಣ್ಣವರಿರುವಾಗಲೇ ಕ್ಯಾನ್ಸರ್ ನಿಂದ ತೀರಿಕೊಂಡರಂತೆ. ಬಳಿಕ ಏಕಾಂಗಿಯಾಗಿ ಈ ಮೂರು ಹೆಣ್ಣುಗಳನ್ನು ಸಾಕಿ ಬೆಳೆಸಿದ್ದು ,ಅವರಿಗೆ ಶಿಕ್ಷಣ ಕೊಡಿಸಿದ್ದು ಅಪ್ಪನಾಗಿ  ಆಲ್ಬೇರ್ತ್. ಅವರು ಆ ಕೂಡಲೇ ಬೇರೆ ಮದುವೆ ಆಗಲಿಲ್ಲ. ಮೂರು ಹೆಣ್ಣುಮಕ್ಕಳು ಮದುವೆಯಾಗಿ ಬೇರೆ ಬೇರೆ  ಕಡೆ ವಾಸಮಾಡಿ ಸಂಸಾರ ಮಾಡುವವರು, ಬಿಡುವಾದಾಗಲೆಲ್ಲ ಅಪ್ಪನನ್ನು ಬಂದು ಕಾಣುತ್ತಿದ್ದರು. ಕ್ರಿಸ್ಮಸ್ ದಿನ ಅವರೆಲ್ಲರೂ ಒಟ್ಟು ಸೇರುವ  ಒಂದು ಸಂಭ್ರಮದ ಕೂಟ.ಅಪ್ಪ ನಿವೃತ್ತಿ ಹೊಂದಿದ ಮೇಲೆ ಒಬ್ಬರೇ ಇರುತ್ತಾರೆ ಎನ್ನುವ ಕಾರಣಕ್ಕೆ ಮೂವರು ಹೆಣ್ಣು ಮಕ್ಕಳು ಒತ್ತಾಯ ಮಾಡಿ ಆಲ್ಬೇರ್ತ್ ಗೆ ಪರಿಚಯ ಇದ್ದ ಎರ್ಮಾ ಅವರನ್ನು ಅಪ್ಪನ ಹೆಂಡತಿಯಾಗಿ ಒಪ್ಪಿಸಿ ,ಸಂಗಾತಿಯಾಗಿ  ಮನೆಯಲ್ಲಿ ಇರುವಂತೆ ಮಾಡಿದ್ದಾರೆ.ಅಪ್ಪ ಆಲ್ಬೇರ್ತ್ ಮತ್ತು ಮೂವರು ಹೆಣ್ಣು ಮಕ್ಕಳು ಹೈಕೆ,ಕಾರಿನ್ ,ಊತ್ತೆ ಅವರ ನಡುವಿನ ಪ್ರೀತಿಯ ಸ್ಪರ್ಶದ ಹೊಳಹುಗಳನ್ನು ಮೊನ್ನೆಯ ಕ್ರಿಸ್ಮಸ್ ರಾತ್ರಿಯ ಕ್ಷಣ ಕ್ಷಣವೂ ನಾನು ಗಮನಿಸುತ್ತಿದ್ದೆ.ಮೂವರು ಹೆಣ್ಣುಮಕ್ಕಳು ಪ್ರತಿಯೊಬ್ಬರೂ ತಾವು ಬರುವಾಗ ತಮ್ಮ ತಮ್ಮ ಮನೆಗಳಲ್ಲಿ ಕ್ರಿಸ್ಮಸ್ ಊಟದ ಅನೇಕ ಪದಾರ್ಥಗಳನ್ನು ಸಿದ್ಧಮಾಡಿಕೊಂಡು ತಂದಿದ್ದರು.

ಕ್ರಿಸ್ಮಸ್ ಎಂದರೆ ಅಡುಗೆ ಮಾಡುವುದು,ತಿನ್ನುವುದು,,ಕುಡಿಯುವುದು,ಹಾಡುವುದು, ಕುಣಿಯುವುದು, ಕ್ರಿಸ್ಮಸ್ ಮರ ಅಲಂಕರಿಸುವುದು,ಪ್ರಾರ್ಥನೆ ಮಾಡುವುದು -ಇವೆಲ್ಲಾ ಆಚರಣೆಗಳು .ಆದರೆ ಇವೆಲ್ಲಕ್ಕಿಂತ ಬಹಳ ಮಹತ್ವದ್ದು ಎಂದು ನನಗೆ ಕಾಣಿಸಿದ್ದು -ಮೊನ್ನೆ ಆಲ್ಬೇರ್ತ್ ಮನೆಯ ಕ್ರಿಸ್ಮಸ್ ನಲ್ಲಿ ‘ಮನೆ’ಯೊಂದು ‘ಕುಟುಂಬ’ ಆಗಿ, ಮತ್ತೆ ಮತ್ತೆ ಮರವಾಗಿ ಚಿಗುರುವುದು ,ಬೆಳಕಿನ ಚುಕ್ಕಿಗಳಾಗಿ ಹೊಳೆಯುವುದು,ಅದರ ಆಶ್ರಯದಲ್ಲಿ ಗೋದಲಿಯಲ್ಲಿ ಮಲಗಿದ ಮಗು ಯೇಸುವಿನಂತೆ ಅಪ್ಪ,ಅಮ್ಮ,ಮಕ್ಕಳು ಎಲ್ಲ ಮತ್ತೆ ಮಗುವಿನಂತೆ ಬಾಲ್ಯದ ತಮ್ಮ  ಗೋದಲಿಯಲ್ಲಿ ಮಲಗುವುದು.

ಆಲ್ಬೇರ್ತ್ ಮನೆಯಿಂದ ಪ್ರೀತಿಯ ಬೀಳ್ಕೊಡುಗೆ ಪಡೆದು ಹೊರಬಂದಾಗ  ಹೊರಗಿನ ಕತ್ತಲಿನಲ್ಲಿ ಅಲ್ಲಲ್ಲಿ ಕ್ರಿಸ್ಮಸ್ ಬೆಳಕಿನ ಬೀಜಗಳು ಮೊಳಕೆ ಒಡೆಯುತ್ತಿದ್ದವು. ಆಗ  ನೆನಪಾದದ್ದು ಎರಡು ದಿನಗಳ ಕೆಳಗೆ ನಾನು ಓದಿದ ಟೀನಾ ಶಶಿಕಾಂತ್ ಅವರ ಬ್ಲಾಗ್ ಬರಹ ‘ ಒಂದು ಕ್ರಿಸ್ಮಸ್ ಮರ’ ಮತ್ತು ದೂರದ ಇಂಗ್ಲೆಂಡಿನಲ್ಲಿ ಕ್ರಿಸ್ಮಸ್  ಆಚರಿಸುತ್ತಿರುವ ನನ್ನ ಮಗಳು ಸೊಲ್ಮೆ ಮತ್ತು ಅವಳ ತುಂಟ ಮಗ ನಿವೇನ್. ಗೋದಲಿಯಲ್ಲಿ ಮಲಗುವುದು ಮಗು ಏಸು ಒಬ್ಬನೇ ಅಲ್ಲ ಮತ್ತು  ಕ್ರಿಸ್ಮಸ್ ಮರ ಎಂದೂ ಒಂಟಿಯಲ್ಲ ಎನ್ನುವ ಸತ್ಯದ ಬೆಳಕನ್ನು ಕಂಡದ್ದು ಆಲ್ಬೇರ್ತ್ ಮನೆಯಲ್ಲಿ.

ಚಿತ್ರಗಳನ್ನು ದೊಡ್ಡದಾಗಿ ನೋಡಲು ಅವುಗಳ ಮೇಲೆ ಕ್ಲಿಕ್ ಮಾಡಿರಿ.

Read Full Post | Make a Comment ( 5 so far )

ಜರ್ಮನಿಯಲ್ಲಿ ಕ್ರಿಸ್ಮಸ್ ಸಂತೆ :ದೇಸಿ ಸೊಗಡಿನ ಲೋಕದಲ್ಲಿ ಒಂದು ಸುತ್ತು

Posted on December 24, 2011. Filed under: ಜರ್ಮನಿ, ವ್ಯೂರ್ತ್ಸ್ ಬುರ್ಗ್, Christmas Market | Tags: , , , , , |

ಜರ್ಮನಿಯಲ್ಲಿ  ಕ್ರಿಸ್ಮಸ್  -ನವಂಬರದಲ್ಲೇ ಆರಂಭ ಆಗುತ್ತದೆ. ಇಲ್ಲಿ ಕ್ರಿಸ್ಮಸ್ ನ ಒಂದು ಮುಖ್ಯ ಆಕರ್ಷಣೆ ‘ಕ್ರಿಸ್ ಮಸ್ ಮಾರ್ಕೆಟ್ ‘ (ಕ್ರಿಸ್ಮಸ್ ಸಂತೆ ).ಸಾಮಾನ್ಯವಾಗಿ ನವಂಬರ ಕೊನೆಯ ವಾರದಿಂದ ದಶಂಬರ ೨೩/೨೪ ರ ವರೆಗೆ ಜರ್ಮನಿಯ ಕೆಲವು ನಗರ ,ಪಟ್ಟಣ ,ಹಳ್ಳಿಗಳಲ್ಲಿ ಪರಂಪರಾಗತ ಶೈಲಿಯಲ್ಲಿ  ವೈವಿಧ್ಯಮಯವಾಗಿ  ‘ಕ್ರಿಸ್ಮಸ್ ಸಂತೆ’ ನಡೆಯುತ್ತದೆ.ಜರ್ಮನಿಯಲ್ಲಿ ಈಗ ಒಟ್ಟು ಸುಮಾರು ಎಪ್ಪತ್ತೈದು ಸ್ಥಳಗಳಲ್ಲಿ ಇಂತಹ ಕ್ರಿಸ್ಮಸ್ ಸಂತೆಗಳನ್ನು ನೋಡಬಹುದು.ನ್ಯೂರೆಮ್ ಬೆರ್ಗ್ ನ ‘ಕ್ರಿಸ್ಮಸ್ ಸಂತೆ ‘ ಜರ್ಮನಿಯಲ್ಲಿ ಅತಿ ಜನಪ್ರಿಯವಾದುದು. ಸುಮಾರು ಒಂದು ತಿಂಗಳ ಕಾಲ  ಬೇರೆ ಬೇರೆ ಊರುಗಳಲ್ಲಿ ನಡೆಯುವ ಕ್ರಿಸ್ಮಸ್ ಸಂತೆಯನ್ನು ನೋಡಲು ಜನರು ಊರಿಂದ ಊರಿಗೆ ಸುತ್ತಾಡುತ್ತಿರುತ್ತಾರೆ.

‘ಕ್ರಿಸ್ಮಸ್ ಸಂತೆ’-  ಈಗ ಯೂರೋಪಿನ ಹೆಚ್ಚಿನ ದೇಶಗಳಲ್ಲಿ ,ಪಶ್ಚಿಮದ ನಾಡುಗಳಲ್ಲಿ ಹೆಚ್ಚು ಪ್ರಚಾರಕ್ಕೆ ಬಂದಿದೆ.ಆದರೆ ಇಂತಹ ‘ಚಳಿಗಾಲದ ಸಂತೆಗಳು ‘ ಮೊದಲು ಆರಂಭ ಆದದ್ದು ಜರ್ಮನಿಯಲ್ಲಿ ಎಂದು ಹೇಳಲಾಗಿದೆ.ಬಳಿಕ ಅದು ಯೂರೋಪಿನ ಬಹುತೇಕ ದೇಶಗಳಿಗೆ ಹರಡಿಕೊಂಡಿದೆ.ಜರ್ಮನಿಯ ಮೂಲರೂಪದ ಪರಂಪರಾಗತ ಕ್ರಿಸ್ಮಸ್ ಸಂತೆಯ ಸ್ವರೂಪವನ್ನು ಈಗ ಕೂಡಾ ಅನೇಕ ಕಡೆಗಳಲ್ಲಿ ಕಾಣಬಹುದು.

ಇಂತಹ ಪರಂಪರಾಗತ ರಮ್ಯ ‘ಕ್ರಿಸ್ಮಸ್ ಸಂತೆ’ ಯಲ್ಲಿ ಕಟ್ಟುವ ಮಳಿಗೆಗಳದ್ದೇ ಬಹುರೂಪಿ ಸೊಬಗು.  ಪಟ್ಟಣದ ಕೇಂದ್ರದ ಬಯಲು ಸ್ಥಳದಲ್ಲಿ ಮರದ ಹಲಗೆ ಮತ್ತು ತುಂಡುಗಳಿಂದ ಕಟ್ಟಿಕೊಳ್ಳುವ ಸಣ್ಣ ಪುಟ್ಟ ಮಳಿಗೆಗಳ ನಿರ್ಮಾಣ ಮತ್ತು ಅಲಂಕರಣವೇ ನೋಡಲು ಕಣ್ಣುಗಳಿಗೆ ಹಬ್ಬ.ಪ್ರತಿಯೊಂದು ಮಳಿಗೆಯವರೂ ತಮ್ಮ ತಮ್ಮ ಮಳಿಗೆಗಳನ್ನು ಸೃಜನಶೀಲವಾಗಿ ಕಲಾತ್ಮಕವಾಗಿ ಅಲಂಕರಿಸಿರುತ್ತಾರೆ.ಮಳಿಗೆಯ ಮಾಡಿನ ಮೇಲೆ ಪ್ರಾಣಿಗಳ -ಕುರಿಮರಿ  ಇತ್ಯಾದಿ -ಆಕೃತಿಗಳಿಂದ ತೊಡಗಿ, ಮಳಿಗೆಯ  ಮುಂಭಾಗ ಮತ್ತು ಒಳಭಾಗವನ್ನು ಸಹಜ ಎಲೆ, ಹೂವು ಮತ್ತು ತಮ್ಮದೇ ವಸ್ತುಗಳಿಂದ ಮೋಹಕವಾಗಿ ಸಿಂಗರಿಸುತ್ತಾರೆ.ರಾತ್ರಿ ಹೊತ್ತು ಚಿಕ್ಕ ಚಿಕ್ಕ ಬಲ್ಬುಗಳಿಂದ ಮಿನುಗುವ ಮಂದ ಬೆಳಕಿನ ನೋಟ ಚೇತೋಹಾರಿಯಾಗಿ ಇರುತ್ತದೆ.ನಮ್ಮ ದೇಶದ ವಿದ್ಯುತ್  ದೀಪಾಲಂಕಾರದಂತೆ ಜಗಜಗಿಸುವ ಕಣ್ಣು ಕೋರೈಸುವ ದೀಪಾಲಂಕಾರ ಇರುವುದಿಲ್ಲ.ಜರ್ಮನ್ ಕ್ರಿಸ್ಮಸ್ ಸಂತೆಯ ಮಳಿಗೆಗಳ ಒಳಗೆ ಮತ್ತು ಮುಂಭಾಗದಲ್ಲಿ ಅಲ್ಲಿ ಮಾರುವ ವಸ್ತುಗಳನ್ನು ಜೋಡಿಸಿಟ್ಟ  ವಿನ್ಯಾಸಗಳೇ ತುಂಬಾ ಆಲಂಕಾರಿಕ ಮತ್ತು ಸೌಂದರ್ಯಾತ್ಮಕ .ಈರೀತಿಯ ಮಳಿಗೆಗಳ ಅಲಂಕಾರ ,ಜೋಡಣೆಗಳನ್ನು ಪರಿಶೀಲಿಸಿ ಅವುಗಳಿಗೆ ಸಂತೆಯ ಕೊನೆಯ ದಿನ ಬಹುಮಾನ ಕೊಡುವ ಪ್ರೋತ್ಸಾಹದ ಪರಿಕ್ರಮ ಜರ್ಮನಿಯ ಅನೇಕ ನಗರಗಲ್ಲಿ ಇದೆ.ನ್ಯೂರೆಮ್ ಬೆರ್ಗ್ ನಲ್ಲಿ ಅಲ್ಲಿನ ಕ್ರಿಸ್ಮಸ್ ಸಂತೆಯ ಮಳಿಗೆಗಳ ವಿನ್ಯಾಸಕ್ಕೆ ಚಿನ್ನ,ಬೆಳ್ಳಿ ಮತ್ತು ಕಂಚಿನ ವಾರ್ಷಿಕ ಬಹುಮಾನಗಳನ್ನು ಕೊಡುವ ಪದ್ಧತಿ ಇದೆ.

ಇಲ್ಲಿನ  ಮಳಿಗೆಗಳಲ್ಲಿ ಮಾರಾಟ ಆಗುವವು’ ಸರಕುಗಳು’ ಅಲ್ಲ. ತಿನ್ನುವ ಕುಡಿಯುವ ತಿಂಡಿಗಳು ಮತ್ತು ಪಾನೀಯಗಳು ಎಲ್ಲವೂ ಬೇರೆ ಕಡೆ ರೆಸ್ಟೋರೆಂಟ್ ಗಳಲ್ಲಿ ಸಾಮಾನ್ಯವಾಗಿ ಸಿಗುವವು ಅಲ್ಲ.ಇವೆಲ್ಲ ಕ್ರಿಸ್ಮಸ್ ಗಾಗಿಯೇ ಮನೆಗಳಲ್ಲಿ ತಯಾರಿಸಿದ ದೇಸಿ ತಿಂಡಿತಿನಿಸುಗಳು.ಇವುಗಳಲ್ಲಿ ಬಹಳ ಜನಪ್ರಿಯವಾದ ಒಂದು ತಿನಿಸು ‘ಶುಂಟಿಯ ಬ್ರೆಡ್ ‘( Lebkuchen).ಸುಟ್ಟು ಬೇಯಿಸಿದ  ಸಾಸೆಜ್ ,ಹೊಗೆಯಾಡುತ್ತಿರುವ  ಕರಿದ ಸಾಸೆಜ್ ,ಹುರಿದ  ಬಾದಾಮಿ ಮತ್ತು ಇತರ ಸ್ಥಳೀಯ ಕಾಳುಗಳು, ಹುರಿದ ಜೋಳದ ಕಾಳು,ಬೇಯಿಸಿ ಒಣಗಿಸಿದ ಹಣ್ಣುಗಳು-ಸೇಬು  ,ಪ್ಲಂ,ಪಿಯರ್ ,ಸ್ಟೋನ್ ಆಪಲ್ ಮುಂತಾದವು. ಇವು ಎಲ್ಲವೂ ಮನೆಗಳಲ್ಲಿ  ಕೈಯಿಂದಲೇ ಮಾಡಿದವು.ಹಣ್ಣುಗಳನ್ನು ಒಣಗಿಸಿ ಕತ್ತರಿಸಿ ,ಅದನ್ನು ತಿಂಡಿಯಂತೆ ಬಳಸುವುದು ಇಲ್ಲಿ ಬಹಳ ವಿಶೇಷವಾಗಿದೆ .ಹಾಗೆಯೇ ಅನೇಕ ಬಗೆಯ ಸಿಹಿತಿಂಡಿಗಳನ್ನು ಮನೆಗಳಲ್ಲಿ ಮಾಡಿಕೊಂಡು ಸಂತೆಗೆ ತಂದು ಮಾರುತ್ತಾರೆ.ಈ ಸಂತೆಯಲ್ಲಿ ಮಾರುವ ಎಲ್ಲ ತಿಂಡಿ ತಿನಿಸುಗಳು ಮನೆಮನೆಗಳಲ್ಲಿ ಪ್ರೀತಿ ಸಂಭ್ರಮದಿಂದ ತಯಾರಿಸಿದ ಅಪ್ಪಟ ದೇಸಿ ರುಚಿಯವು.ಒಂದು ಕಾಲಕ್ಕೆ ನಮ್ಮ ಊರುಗಳಲ್ಲಿ ಎಲ್ಲ ಹಬ್ಬಗಳಿಗೂ ಮನೆಯಲ್ಲೇ ಬಗೆ ಬಗೆಯ ತಿಂಡಿ ಮಾಡುತ್ತಿದ್ದರು.ಚೌತಿ (ಗಣೇಶನ ಹಬ್ಬ ) ,ದೀಪಾವಳಿಯಲ್ಲಿ ಮನೆಗಳಲ್ಲಿ ಮಾಡುತ್ತಿದ್ದ  ದೇಸಿ ತಿನಿಸುಗಳು ಈಗ ಬಹುತೇಕ ಕಣ್ಮರೆಯಾಗಿವೆ.

ಜರ್ಮನಿಯ ‘ಕ್ರಿಸ್ಮಸ್ ಸಂತೆ’ಯ ಇನ್ನೊಂದು ಆಕರ್ಷಣೆ -’ಬಿಸಿ ಮಸಾಲೆ ವೈನ್ ‘ ( ಜರ್ಮನ್ ಭಾಷೆಯಲ್ಲಿ  Gluehwein , ಇಂಗ್ಲಿಶ್ ನಲ್ಲಿ Mulled Wine ).ಸಾಮಾನ್ಯವಾಗಿ ವೈನ್ ಎಂದರೆ ಅದು ತಣ್ಣಗೆ ಇರುತ್ತದೆ.ಆದರೆ ಕ್ರಿಸ್ಮಸ್ ಸಂತೆಯಲ್ಲಿ ದೊರೆಯುವ ಈ ‘ಬಿಸಿ ಮಸಾಲೆ ವೈನ್’ ಇಲ್ಲಿ ಚಳಿಗಾಲದಲ್ಲಿ ಕ್ರಿಸ್ಮಸ್ ಸಮಯದಲ್ಲಿ ಮಾತ್ರ ವಿಶೇಷವಾದದ್ದು.ನೀರು,ಸಕ್ಕರೆ,ದಾಲ್ಚೀನಿ ಕಡ್ಡಿಗಳು ,ಲವಂಗ,ಕಿತ್ತಳೆ ಅಥವಾ ನಿಂಬೆ ರಸ ,ಕೆಂಪು ವೈನ್ ,ಕೆಲವೊಮ್ಮೆ ವನಿಲ್ಲಾ ಸಿಪ್ಪೆ -ಇಷ್ಟನ್ನು ಚೆನ್ನಾಗಿ ಬಿಸಿಮಾಡಿದಾಗ  ‘ಬಿಸಿ ಮಸಾಲೆ ವೈನ್ ‘ಸಿದ್ಧವಾಗುತ್ತದೆ.ಮಿಶ್ರಣ ಮಾಡಿದ ದ್ರವವನ್ನು  ಹೆಚ್ಚು ಕುದಿಸಬಾರದು,ಚೆನ್ನಾಗಿ ಬಿಸಿ ಮಾಡಿದರೆ ಸಾಕು.ಈ ಬಿಸಿ ವೈನನ್ನು ಗ್ಲಾಸ್ ಗಳಲ್ಲಿ ಹಾಕಿದರೆ ಗ್ಲಾಸ್ ಒಡೆಯುತ್ತದೆ.ಅದಕ್ಕಾಗಿ ಮಗ್ ಗಳಲ್ಲಿ ಹಾಕಿ ಕೊಡುತ್ತಾರೆ.ಈ ಬಿಸಿ ಮಸಾಲೆ ವೈನ್ ಬಹಳ ಬೇಗನೆ ತಲೆಗೆ ಏರುತ್ತದೆ.ಹಾಗಾಗಿ ಇದನ್ನು ‘ಕ್ರಿಸ್ಮಸ್ ಸಂತೆ’ಯಲ್ಲಿ ಎಲ್ಲ ತಿರುಗಾಟ ಮತ್ತು ವ್ಯಾಪಾರ ಮುಗಿದ ಬಳಿಕ ಕುಡಿಯುತ್ತಾರೆ.ನಡುಗುವ ಚಳಿಯಲ್ಲಿ ಹೊರಗೆ ನಿಂತುಕೊಂಡು ಬಿಸಿ ವೈನ್ ಕುಡಿಯುವುದರಿಂದ ಅಷ್ಟು ಮಟ್ಟಿಗೆ ಚಳಿಯ ತೀವ್ರತೆಯ ಅನುಭವ ಕಡಮೆ ಆಗುತ್ತದೆ.  ಜರ್ಮನ್ ಭಾಷೆಯಲ್ಲಿ’ Glueh’ (=glow) ಎಂದರೆ ‘ಉರಿಯುವುದು’  ಅಥವಾ’ ಹೊಳೆಯುವುದು ‘ಎಂದು ಅರ್ಥ.ಈ ಬಿಸಿ ಮಸಾಲೆ ವೈನ್ ಕುಡಿಯುವುದರಿಂದ ಹೊಟ್ಟೆಯಲ್ಲಿ ಬಿಸಿಯ’ ಉರಿಯ’ ಅನುಭವ ,ತಲೆಯಲ್ಲಿ ಹೊಸತು ‘ಹೊಳೆಯುವ ‘ಅನುಭವ ಆಗುವ ಕಾರಣ ಅದರ ಹೆಸರು ಸಾರ್ಥಕ ಆಗುತ್ತದೆ!

ಕ್ರಿಸ್ಮಸ್ ಸಂತೆಯ ಹೆಚ್ಚಿನ ಸಂಖ್ಯೆಯ ಮಳಿಗೆಗಳು ಉಡುಗೊರೆಯ ವಸ್ತುಗಳು .ಅವೆಲ್ಲಾ ಕರಕುಶಲ ಸಾಮಗ್ರಿಗಳು.ಮರದಿಂದ ಮತ್ತು ಪಿಂಗಾಣಿಯಿಂದ  ತಯಾರಿಸಿದ ಬಗೆಬಗೆಯ ಗೊಂಬೆಗಳು,ಆಟಿಕೆಗಳು,ಗೋದಲಿಗಳು ,ಬೇರೆ ಬೇರೆ ಮಾದರಿಯ ಮರದ ಕೆತ್ತನೆಗಳು ,ಕಸೂತಿಯ ವಸ್ತುಗಳು,ಮಣಿಸರಕಿನ ಸಾಮಗ್ರಿಗಳು,ನೂಲಿನಿಂದ ಮಾಡಿದ ಬೊಂಬೆಗಳು,ಕ್ಯಾಂಡಲ್ ಗಳು,ಚಿಕ್ಕ ಚಿಕ್ಕ ಆಕೃತಿಗಳು,ಆಭರಣಗಳು,ಕರಕುಶಲ ವಸ್ತುಗಳು ಇತ್ಯಾದಿ.ಕ್ರಿಸ್ಮಸ್ ಮರದ ಅಲಂಕಾರದ ವಸ್ತುಗಳು ,ತೂಗುಹಾಕುವ ಚರ್ಮದ ಬೂಟ್ಸ್ ಗಳು -ಹೀಗೆ ನಾನಾ ಬಗೆಯವು ಅಲ್ಲಿ ಮಳಿಗೆಗಳಲ್ಲಿ ದೊರೆಯುತ್ತವೆ.ಮಳಿಗೆಯಲ್ಲಿಯೇ ಗಾಜನ್ನು ಬೆಂಕಿಯಲ್ಲಿ ಕರಗಿಸಿ ,ಅಲ್ಲೇ ಗಾಜಿನ ವಸ್ತುಗಳನ್ನು ಸಿದ್ಧಪಡಿಸಿ ಕೊಡುವ ಸೌಲಭ್ಯ ಇದೆ.

ಈರೀತಿ ‘ಕ್ರಿಸ್ಮಸ್ ಮಳಿಗೆ’ಗಳಲ್ಲಿ ದೊರೆಯುವ ಎಲ್ಲ ವಸ್ತುಗಳೂ ಕೈಕಸುಬಿನ ಮೂಲಕ ಮನೆಗಳಲ್ಲಿಯೇ ಪರಂಪರಾಗತ ರೀತಿಯಲ್ಲಿ ಸಿದ್ಧವಾದವು.ಬೃಹತ್ ಪ್ರಮಾಣದಲ್ಲಿ ಕಾರ್ಖಾನೆಗಳಲ್ಲಿ ನಿರ್ಮಾಣವಾಗುವ ಯಾವುದೇ ವಸ್ತುಗಳನ್ನು ಇಂತಹ ‘ಕ್ರಿಸ್ಮಸ್ ಸಂತೆ’ಯಲ್ಲಿ ಮಾರಾಟ ಮಾಡಲು ಅವಕಾಶ ಇರುವುದಿಲ್ಲ.ಪ್ಲಾಸ್ಟಿಕ್ ನಿಂದ ತಯಾರಾದ ವಸ್ತುಗಳನ್ನು,ಪ್ರಾಣಿಗಳ ತುಪ್ಪಳದ ಹಾರಗಳನ್ನು ,ಬೃಹತ್ ಪ್ರಮಾಣದಲ್ಲಿ ಸಿದ್ಧಪಡಿಸಿದ ಆಟಿಕೆಗಳನ್ನು ,ಆಧುನಿಕ ಯಂತ್ರ ನಿರ್ಮಿತ ವಸ್ತುಗಳನ್ನು ‘ಕ್ರಿಸ್ಮಸ್ ಸಂತೆ’ಗಳಲ್ಲಿ ನಿಷೇಧಿಸಲಾಗಿದೆ.ಹಾಗಾಗಿ ಇಲ್ಲಿ ಬರುವವರು ಗ್ರಾಮೀಣ ಕೈಕಸುಬಿನ ದುಡಿಮೆಯ ಫಲಗಳನ್ನು ಮಾತ್ರ ಕೊಳ್ಳುತ್ತಾರೆ, ಮನೆಗಳಲ್ಲಿ ತಯಾರಿಸಿದ ತಿಂಡಿ ತಿನಿಸುಗಳನ್ನು ಮಾತ್ರ ತಿನ್ನುತ್ತಾರೆ . ದುಡಿಯುವವರ ಸ್ವರ್ಗದ ಕನಸನ್ನು ಈ ಲೋಕದಲ್ಲೇ ನಿಜಮಾಡುತ್ತವೆ – ಬಡವರ ಬಗೆಗಿನ ಕರುಣೆಯ ಸಂದೇಶ ಸಾರಿದ ಏಸುವಿನ ಹೆಸರಿನ ಹಬ್ಬದ ಈ ‘ಕ್ರಿಸ್ಮಸ್ ಸಂತೆಗಳು.’

ಮೊನ್ನೆ ಗುರುವಾರ ,ದಶಂಬರ ೨೨ ರಂದು ನಮ್ಮ ವ್ಯೂರ್ತ್ ಬುರ್ಗ್  ನಗರದ ಕೇಂದ್ರವಾದ  ಮಾರ್ಕೆಟ್ ಸ್ಥಳದಲ್ಲಿ , ಕಳೆದ ತಿಂಗಳು ನವಂಬರ ೨೫ ರಿಂದ ನಡೆಯುತ್ತಿರುವ ‘ಕ್ರಿಸ್ಮಸ್ ಸಂತೆ’ಯಲ್ಲಿ , ಮಳಿಗೆಯಿಂದ ಮಳಿಗೆಗೆ ಸುತ್ತು ಹಾಕಿ ,ಹನಿ ಹನಿ ಮಳೆಯಲ್ಲಿ ತಣ್ಣನೆ ತೋಯುತ್ತಾ ನಾನು ತೆಗೆದ ಫೋಟೋಗಳು ಇಲ್ಲಿ ಇವೆ.ಅವುಗಳನ್ನು ದೊಡ್ಡದಾಗಿ  ನೋಡಲು  ಅವುಗಳ  ಮೇಲೆ ಕ್ಲಿಕ್ ಮಾಡಿರಿ.

ಈದಿನ ಶನಿವಾರ  ,ದಶಂಬರ ೨೪ , ಗ್ರಾಮೀಣ ಜರ್ಮನಿಯ ಕ್ರಿಸ್ಮಸ್ ಆಚರಣೆ ನೋಡಲು ಮತ್ತು ಪಾಲುಗೊಳ್ಳಲು ಪ್ರೊ.ಹೈದ್ರೂನ್ ಬ್ರೂಕ್ನರ್ ಅವರ ಆಹ್ವಾನದಂತೆ ಅವರ ಜೊತೆಗೆ ,ಬಾದೆನ್-ವ್ಯೂರ್ತೆಮ್ ಬೆರ್ಗ್ ಪ್ರಾಂತ್ಯದ ‘ವೈನ್ ಗಾರ್ತೆನ್’ ಎಂಬ ಊರಿಗೆ ಹೋಗುತ್ತಿದ್ದೇನೆ.ಸೋಮವಾರ ಸಂಜೆ ಮತ್ತೆ ವ್ಯೂರ್ತ್ಸ್ ಬುರ್ಗಿಗೆ.  ಇದು ಈಬಾರಿ ಕ್ರಿಸ್ಮಸ್ ರಜೆಯ ಮೊದಲ ಸುತ್ತಾಟ. ಲ್ಯಾಪ್ ಟಾಪ್ ಎಂಬ ನನ್ನ ಶಿಲುಬೆಯನ್ನು ಇಲ್ಲೇ ಬಿಟ್ಟು ಹೊರಟಿರುವುದು ಈಗ ದಕ್ಷಿಣಾಪಥಕ್ಕೆ.

Read Full Post | Make a Comment ( 2 so far )

ಮೊದಲ ಹಿಮ ಮುತ್ತಿನ ಪುಳಕದ ಚಿತ್ರಗಳು

Posted on December 22, 2011. Filed under: ಜರ್ಮನಿ, ವ್ಯೂರ್ತ್ಸ್ ಬುರ್ಗ್, Wurzburg | Tags: , , |

ಜರ್ಮನಿಯ ವ್ಯೂರ್ತ್ಸ್ ಬುರ್ಗ್ ನಲ್ಲಿ ಈ ಬಾರಿಯ ಚಳಿಗಾಲದ ಮೊದಲ ಹಿಮದ ಪಕಳೆಗಳು ಉದುರಿದ್ದು ಮೊನ್ನೆ ಮಂಗಳವಾರ ,ದಶಂಬರ  ಇಪ್ಪತ್ತರಂದು.ನಮ್ಮ ವಿಶ್ವವಿದ್ಯಾನಿಲಯದ ಕ್ಯಾಂಪಸ್ ಹುಬ್ಲಾಂದ್ ನಲ್ಲಿ, ನನ್ನ ನಿವಾಸ ವಿವಿ ಅತಿಥಿಗೃಹದ ಕೈದೋಟದಲ್ಲಿ ಚೆಲ್ಲಿದ  ಬಿಳಿಯ ಮಲ್ಲಿಗೆಯ ಹಾಗೆ ಹರಡಿಕೊಂಡಿರುವ ನೋಟಗಳ ಚಿತ್ರಗಳು ಇಲ್ಲಿವೆ.ತಲೆಯ ಮೇಲೆ ,ಮೈಯ ಮೇಲೆ,ಗಿಡ ಗಂಟಿಯ ಮೇಲೆ,ನೆಲದಲ್ಲಿ ಎಲ್ಲ ಕಡೆ ಮುತ್ತಿಕ್ಕುವ ಹಿಮದ ಮುತ್ತುಗಳ ಮೊದಲ ಸ್ಪರ್ಶದ ಪುಳಕದ  ಸುಖದ ತಣ್ಣನೆಯ ಅನುಭವ.

Read Full Post | Make a Comment ( 6 so far )

« Previous Entries

Liked it here?
Why not try sites on the blogroll...

Follow

Get every new post delivered to your Inbox.

Join 68 other followers